Rezistans ek Alternativ solider avek abitan Le Morne

Rezistans ek Alternativ tenir a exprim so solidarite a bann abitan vilaz Morne ki pe okip later ki trouv deryer vilaz.

Rezistans ek Alternativ solider de abitan le Morne parski nou estime ki drwa a lozman ek a later se enn drwa imin. Rezistans ek Alternativ solider de abitan le Morne parski pase lesklavaz sa pei la pa finn rann zistis a bann viktim sa sistem barbar la. Sa later ki bann abitan Morne pe okipe la, dispite par Société Le Petit Morne Ltée reprezante par Agathe Desveaux de Marigny dan la kour. Rezistans ek Alternativ trouv ki sa okipasyon la li zis ek neseser parski bann abitan Morne, parey kouma boukou lezot vilaz la rezion, viktim de nou listwar. Sa listwar ki depi plizir siek pa finn rann zistis a dimounn ki ti konsidere kouma ‘bien meuble’ dan kod nwar ek ki ti viktim sistem lesklavaz.

Si leta Morisien ti rann zistis a sa bann dimounn la pa ti pou ena otan inegalite sosyal dan Moris. Dan sertin rezion Moris sa inegalite al ankor pli violan ek vizib. Malgre labolision lesklavaz metie servitid ek non remiz an kestion rises akimile par proprieter esklav inn ed mintenir aservisman dan boukou rezion Moris. Zordi sa sitiasion la, azoute a agrandisman popilasion avek lekours efrene bann pli ris pou imobilie pe amenn a enn veritab kriz later ek lozman. Se inikman de sa ki bann abitan Morne koupab. Zot koupab de leritaz ek sekel ki lesklavaz inn lese lor zot dan enn moman kot la bourzwazi pe akapar ek pe morsele tou later Moris pou etranze.

Li irzan ki Premye Minis Pravind Jugnauth tann ek konpran detres bann fami ki pe abit vilaz Morne. Ki Pravind Jugnauth konpran ki se pa sekter prive ki bizin regle problem lozman ek sosyal dan sa pei la. Ki Pravind Jugnauth konpran ki le Morne sitie kouma enn de bann vilaz pli pov la Repiblik Moris. Ki Pravind Jugnauth konpran ki vilaz le Morne dan so leta aktiel pe toufe par sirpopilasion ek sa sitiasion la pe amenn a boukou prekarite. Ki Pravind Jugnauth konpran ki vilazwa le Morne port an zot memwar maronaz ki fer la fierte le Morne kouma enn patrimwann limanite. Ki Pravind Jugnauth konpran ki leta ek so gouvernman ena la responsabilite istorik ek de memwar anver abitan Morne.

Rezistans ek Alternativ inn touzour solider de vilazwa Morne ki pe dibout avek boukou kouraz ek determinasyon. Malgre tou tantativ intimidasion zot inn tini ferm pou defann zot drwa a later ek lozman dan zot vilaz. Rezistans ek Alternativ pou kontinn dibout akote sa bann vilazwa la ek pe dimann a seki Pravind Jugnauth :

a) pran dispozision legal neseser pou enn akizision obligatwar porsion later 43 arpan ki trouv deryer vilaz dan lintere piblik,

b) ki leta ansam ek vilazwa travay lor enn plan amenazman sosyal pou lozman ek prodiksion agrikol pou bienet vilaz,

c) ki leta fasilit enn program pou enn developman ekonomik vilaz atraver aktivite kiltirel, lwazir, environmantal ek istorik an lien avek le Morne kouma patrimwann mondial.