Lapolis konvok Ashok Subron

Rezistans ek Alternativ pe inform piblik ek media ki Ashok Subron, enn parmi bann port parol Rezistans ek Alternativ, ek plizyer lorganizasion sindikal ek sosyal, inn konvoke par Southern Division Lapolis, swit a enn Statement ki enn azan konpanye Sid Afrikin, Clear Ocean Hotel and Resort Ltd, inn mete kont Rezistans ek Alternativ ek Ashok Subron Lindi apre-midi dan Station Lapolis Chemin Grenier. Sa fer swit a loperasion liberasion laplaz Pomponette, ki Rezistans ek Alternativ ti organize Dimans 30 Juin 2019.

Se Mardi le 2 Juillet 2019, ki Southern Division Lapolis, finn inform Ashok Subron, ki Clean Ocean Hotel and Resort Ltd, finn konsiyn enn depozision pou bann evennman ki finn deroule Dimans 30 Juin 2019 lor laplaz Pomponette. Sa zour-la, kouma antie Moris kone, bann aktivis Rezistans ek Alternativ, ti proteste pou reklam ki konpanyi kapitalist Sid Afrikin lev pake ale, pwiske li non selman finn akapar enn laplaz lepep moris, me osi parski li an sitiasion violasion bann kondision ki leta Morisien inn mete dan kad bay ki finn akord li.

Dimans 30 Juin 2019, plizir aktivis Rezistans ek Alternativ finn sinbolikman anlev plizir fey tol dan baraz ki ti erize pou interdi akse a piblik morisyen a laplaz Pomponette. Sa laksion dezobeisans sivil ti inevitab ek lezitim, etan done ki malgre vag protestation ki finn ena depi plis ki 3-an, gouvernman inn fer sourd orey.

Rezistans ek Alternativ asim plennman responsabilite pou laksion de dezobeisans sivil ki nou finn fer Dimans dernie dan Pomponnette, ek a 2 repriz avan an 2017 ek 2018. Kan enn linzistis ek violasion flagran drwa lepep inn komet, kan lotorite institisionel refiz azir dan lintere lepep ek zenerasion avenir, li devwar lezitim pou sitwayen antam dezobeisans sivil politik pou fer tann lavwa la rezon. Laksion pasifik-
Rezistans ek Alternativ li an liyn avek laksion dezobeisans sivil ki Mahatma Gandhi (Lind), Rosa Parks (USA) ek fam dan Sid Afrik (Sharpeville) finn fer kont linzistis.

Rezistans ek Alternativ, reklam ki Minis Jhugroo, depi Minister Housing, fer enn deklarasion ofisiel, lor dezision gouvernma lor Laplaz Pomponette dan bann zour ki pe vini. Premie Minis Pravind Jugnauth ek Minis Jugroo ena enn responsabilite viz-a-vi lepep ek Leta li mem.

Bizin rapel ki Rezistans ek Alternativ enn manb fondater de Coalision Aret Kokin Nou Laplaz. Rezistans ek Alternativ osi milite kont ‘beach grabbing’ dan plizier lezot plas, kuma Les Salines, Riviere noires, kont akaparman ek destriksion Wetlands par NMH ltd, ubyen kont akaparman debrakader peser dan Bain de Rosnay.

Rezistans ek Alternativ plennman inplike dan konba laplaz ek lakot akoz depli an pli ena enn akarparman ou destriksion lekolozi lakot, ki pe arive avek model devlopman sovaz perpertie par diferan rezim opouvwar ek elit ekonomik kapitalist.