ki finn donn lord pou intimid David Sauvage?

Zordi 16 Septam, David Sauvage, militan ekolozis ek manb Rezistans ek Alternativ, ti bizin a nouvo prezant lakour distrik Savanne pou case Rogue and Vagabond ki lapolis ti loze kont li.

Reprezantan biro DPP ti prezan lakour ek finn demann ki rey tou bann sarz kont David Sauvage. Bann propo DPP klerman donn Rezistans ek Alternativ rezon kan li denons arestasyon David kouma enn ak intimidasyon politik, kan DPP inn vinn dir dan lakour ki Lapolis pa ti konsilte li avan azir. Se swit a deklarasyon reprezantan DPP ki Mazistra Yogesh Bhookhun finn dismiss tou sarz kont David.

Sa soulev enn grav kestion : Sou ki lord lapolis ti pe azir ?

Sa kestion la poze sirtou kan David Sauvage o mem moman so arestasyon ti pe denons krim ekolozik lor Les Salines Riviere Noire dan Tribinal Lanvironnman. DPP inn osi emet lezot rezon pou dimann dismiss sa case la, don febless bann evidans ek lanket ki la pourswit inn presante. Lii kler ki La Polis zordi pou bizin reponn lor sa bann kestion la.

Eski se dimounn dan gouvernman ki finn donn instriksion Mario Nobin pou avoy so zom pou intimid David Sauvage ?

Eski se gro kapitalis ki pe defons wetland dan Les Salines Riviere Noire ki finn donn lord Mario Nobin pou avoy so zom pou intimid David Sauvage ?

Pour rapel lapolis ti pe pourswiv David Sauvage swit a enn aktivite lor laplaz Pomponette kot Rezistans ek Alternativ ti pe partisipe pou denons lakaparman sa laplaz la le 11 Mars 2018. Lapolis finn debark kot la fami David Sauvage ek ti pe rod li kouma enn vilger kriminel enn an apre bann fe. Dan lakour ti ena boukou kafouyaz avan ki lapolis met bann sarz ofisiel kont David. Tou sa la ti arive o mem moman ki Rezistans ek Alternativ ti pe konteste destriksyon wetland dan les Salines Riviere Noire par NMH. David Sauvage li enn parmi bann ‘apellant’ dan sa case la.

Zordi stand ki DPP inn pran demontre klerman tantativ intimidasion ek represion politik pe mene kont bann militan Rezistans ek Alternativ ki pe denons piyaz nou lanatir ek lakaparman dibien komin tou Morisien.

Apart seki finn arive dan lakour distrik Savanne Leta bizin imediatman:

1) Retourn laplaz Pomponette a piblik Morisien

2) Freeze tou proze lor Wetland Les Salines Riviere Noire

Viktwar David Sauvage kont represyon reprezant enn avanse ek enn intansifikasyon de konba ki bizin mene zordi kont detriksyon nou patrimwann Natirel. Antouka nou dan Rezistans ek Alternativ nou felisit biro DPP ek Mazistra ki pa finn les zot antrene dan konplo ki sertin seksyon Leta inn rod fer pou intimid David Savage ek Rezistans ek Alternativ.

Rezistans ek Alternativ remersie avoka Sheren Govinden ki finn defann sa case la avek fors, ek lansam bann sitwayin Moris ki finn montre zot soutien