La GWF demande l’application d’un « Order » dès que l’avis de Classe III est déclaré

GWF pe lans enn lapel dirzans a Gouvernman ek National Crisis Committee, dan kontex posibilite enn sitiasion siklonik ki kapav koze par intans siklonn Freddy ki pe apros Rodrig ek Moris.Nou dimann Gouvernman ek National Crisis Committee, o-sito ki ena siklonn Klas 3, pou issue enn Order sou seksion 16 (2) The National Disaster Risk Reduction And Management Act 2016.

GWF pe fer sa reket dirzans-la, etan done ki ena danzere kafouyaz legal, ki kapav koz prezidis a travayer Moris.

An Zanvie 2023, Gouvernman finn sanz (pozitivman) lalwa Meteo, lor Warning Siklonn, me gouvernman PA finn sanz an paralel lalwa travay, Workers Rights Act ek sertin Remuneration Orders lor travay ek siklonn.

Selon lalwa travay, tou travayer Moris-Rodrig ena drwa pa al travay, kan ena siklonn klas 3 ou klas 4. Lerla lalwa osi spesifie dan ki kondision enn travayer repran travay kan retir siklonn klas 3 ou klas 4. Savedir enn travayer repran travayer kan transpor piblik disponib ou lanplwayer donn transpor a travayer-la.

Ala ki Workers Rights Act (WRA) dir:

(4) Where a cyclone warning class III or IV is in force, a worker may absent himself from work and the employer
shall pay remuneration to the worker at the normal rate in respect of the period of absence.
(5) Subsection (4) shall apply until –
(a) the cyclone warning class III or IV has been removed;
and
(b) the employer provides a means of transport to the worker to attend his place of work; or
(c) public transport is available.

Seksion 6 (a) ek (b) WRA osi spesifie lezot kondision travay enn travayer dan kondision siklonik, kot servi kriter klas 3 ou klas 4.

Or, depi Zanvie 2023, The Mauritius Meteorological Services-Regulations (Warning) inn rant an viger. Aster pou issue enn safety bulletin apre klas 3 ou klas 4, ki limem pou swiv par enn termination bulletin.

Savedir si siklonn Freddy vinn lor Moris-Rodrig dan bann zour ki pe vini pou ena enn grav kafouyaz legal, akoz lalwa travay fer referans selman a Klas 3 ek Klas 4, kan li spesifie dan ki kondision travayer pou repran travay apure enn siklonn, oubien pou travay kan ena siklonn.

Se pou pou evit enn kafouyaz danzere, ki kapav antrenn pert lavi ek koz prezidis a klas travayer, ki GWF pe dimann ki osi-to ki Meteo emet enn klas 3, ki NCC emet enn Order sou seksion 16 (2) The National Disaster Risk Reduction And Management Act 2016.

Savedir enn Order similer kouma ti emet pou dernie lapli toransiel. Koumsa li pou kler kan enn travayer bizin repran travay apre enn siklonn ek dan ki kondision pou travay pandan siklonn.

Nou panse ki li iresponsab, ki Leta inn permet enn tel kafouyaz legal danzere prevalwar. Nou panse sa finn soi arive, pa zis akoz inkonpetans gouvernman, me li osi akoz konplezans gouvernman viz-a-vi klas patrona.

Sa reflete par enn bias/diskriminasion de klas striktirel dan National Disaster Risk Reduction And Management Act 2016, kot pena ni reprezantan travayer, ni mem reprezantan Minister Travay, ki siez dan National Disaster Risk Reduction and Management Council.

Par kont ena siez rezerve pou reprezantan Business Mauritius, klas patronal!

Nou espere ki aster, ki nou lavey enn potansiel pasaz enn siklonn intans, Gouvernman atraver National Crisis Committee, pou plas lintere piblik ek lintere travayer o-desi, ninport ki lezot konsiderasion, ek akspete propozision ki GWF pe fer. Sinon gouvernman bizin asim responsabilite tou konsekans so linaksion lor sa size-la.

Ashok Subron
Animater, General Workers Federation (GWF)